ژه‌نگه‌سووره‌كانی بووزا

(ژه‌نگه‌سووره‌كان)ی بووزا
له‌نێو بۆڕما
ژه‌هری كینه‌ی سینه‌ی ڕه‌شیان،
به‌سه‌ر هه‌نگه‌ بێنازه‌كاندا، ده‌ڕێژن
ته‌وری جه‌هلیان ده‌ده‌ن له‌سه‌ر
كفنی گڕیان ده‌كه‌نه‌ به‌ر
به‌چه‌كی غه‌در و ملهوڕیی،
لانه‌ و له‌شیان داده‌بێژن
ئێستا هه‌نگه‌ بێ ده‌نگه‌كانی ڕۆهینگیا
وه‌ك گه‌لی كورد، وه‌ك كوردستان!
فه‌له‌ستین و سووریا و چیچان،
هه‌رچی ئازاره‌ ده‌یچێژن
به‌غه‌یری قاپی زاتی هه‌ق
هه‌رچی هیوایه‌ ده‌ینێژن
زلهێزانی بێویژدان و به‌كرێگیراوانی جیهان
به‌باده‌ی خوێن و خیانه‌ت و خۆپه‌رستیی،
وڕ و گێژن
چ مه‌هزه‌له‌یه‌كی سه‌یره‌!
له‌دوا ساتی قڕانی گه‌لان،
ئینجا سه‌رقاڵی ڕاوێژن!!

هۆنراوه‌ی مامۆستا شه‌ریف وه‌رزێر 
5/9/2017